Həyat hekayəsi
Şəhid Pllot Əliyev Xəyyam Əlixan oğlu 17 dekabr 1990-cı il təvəllüdlü, əslən Əmircanlı, neft maqnatı və xeyriyyəçi, əsilzadə Murtuza Muxtarovun nəslindən olan ailədə anadan olmuşdur.
Xəyyam Əliyev 1997-2008-ci illərdə Azərbaycanın Milli Qəhrəmanı Albert Aqarunov adına 154 saylı tam orta məktəbdə təhsil almışdır.
2008-2013-cü illərdə isə Milli Aviasiya Akademiyasında bakalavr və magistr dərəcəsi ilə təhsil almışdır. Sərhəd Qoşunlarında pilot kimi xidmət edərək, kapitan rütbəsinə kimi yüksəlmişdir. Ona Miili Aviasiya Akademiyasının Təlim Mərkəzində müəllim kimi işləmək təklif olunmuşdu, lakin, o Vətənə xidmət etməyi – çətin və məsuliyyətli yolu seçmişdi.
2 qardaş olan Xəyyam qardaşı Fərman ilə birgə 44 günlük Vətən Müharibəsində - biri yerdə, o biri göydə ön cəbhədə xidmət edərək məxfi tapşırıqları əsil zabit kimi dürüst yerinə yetirmiş, böyük şücaət və qəhrəmanlıqlar göstərmiş, sağ-salamat evə qayıtmışlar, lakin Qələbədən 1 il 22 gün sonra Şəhid olmuşdur. Biz nəinki yüksək dərəcəli bir pilotu itirdik,biz həm də bir Vətən Müharibəsi veteranını itirdik.
Kapitan Əliyev Xəyyam Əlixan oğlu Sərhəd Qoşunlarında pilot kimi xidmət etmiş, 30 noyabr 2021-ci il tarixdə Dövlət Sərhəd Xidmətinin (DSX) “Mi-17” tipli hərbi helikopterinin Xızı rayonu ərazisində yerləşən “Qaraheybət” aviasiya poliqonunda hərbi təlimlər zamanı Şəhid olmuşdur.
Xəyyam parlaq gələcəyi olacaq bir gənc pilot idi. Ən yeni uçuş aparatlarının sınaqdan keçirilməsində yaxından iştirak edir, bir neçə xarici dil bildiyınə görə tez-tez müxtəlif ölkələrə ezam olunurdu. Hər dəfə də qayıdanda yüksək ixtisaslı gənc kadr kimi diplom, sertifikat, təşəkkürnamələrlə təltif olunurdu.
Xəyyam respublikamızda yeganə Şəhid pilotdur ki, Azərbaycan Respublikası Prezidenti cənab İlham Əliyevin 17.08.2022-ci il tarixli qərarı ilə ölümündən sonra 3-cü dərəcəli “Vətənə xidmətə görə” ordeni ilə təltif olunub. Hazırda 154 saylı tam orta məktəbin yerləşdiyi küçəyə Bakı Şəhər İcra Hakimiyyəti başçısının qərarı ilə Pilot Xəyyam Əliyevin adı verilib.
Onun adının əbədiləşdirilməsi üçün Vətənə xidmətlərini, örnək olası qısa həyat yolunu nəzərə alaraq, onun haqqında 4K sistemi ilə yüksək keyfiyyətli, peşəkar rejissorlar, yaradıcı qrup tərəfindən sənədli film, mahnı və klip çəkilib, çünki gənc nəsil Xəyyam kimi minlərlə Şəhidimizin qəhrəmanlıq yolunu, şücaətini bilməli, öyrənməli, və yadda saxlamalıdır.